翻译:惡之華/玻璃樽

本作品收錄於《Translation:惡之華》

有種強烈到可穿透萬物嘅香氣，
啲人話佢會貫穿玻璃。
有座棺木嚟自東方，
開嗰陣嘎嘎作響，尖叫抵抗

某荒廢嘅房間入邊有個衣櫃，
充滿歲月嘅酸蝕味，多塵又陰翳，
有時會見到承載住回憶嘅樽仔，
靈動嘅靈魂回歸，喺入邊跳出嚟。

千思萬緒螫伏，如死一般嘅蛹，
喺沉重嘅黑暗輕輕抖動，
佢被蒼藍沾染、粉紅包裹、金黃點綴，
抽出雙翼一飛而去。

叫人神迷嘅回憶飛旋
於紛擾嘅空氣，閉上雙眼。暈眩
俘虜失意嘅靈魂，雙手將佢推轉
畀人間渣滓嘅黑暗深淵。

佢掉佢喺俗世深淵嘅邊緣度，
拉撒路喺度撕爛佢嘅裹屍布，
舊愛腐爛、迷人、陰森似墳塚，
其如魅嘅屍體一邊覺醒一邊作動。

於是當我喺人間嘅回憶迷走，
當我會被棄喺不祥衣櫃嘅角落頭，
個舊樽仔見者猶憐、老朽又鋪滿塵
邋遢、卑賤、黐𥹉𥹉仲有裂痕，

可愛嘅瘟疫，我裝載你嘅屍身，
係你力量同毒性嘅見證人，
同天使特製嘅珍貴毒材!
消蝕我嘅烈酒，叫我嘅心死去活來。

 本译文与其原文有分别的版权许可。译文版权状况仅适用于本版本。

原文	本作品在全世界都属于公有领域，因为作者逝世已经超过100年，并且于1929年1月1日之前出版。
译文	本作品在全世界都属于公有领域，因為著作權所有者如此釋出。